سینیٹر کامران مرتضیٰ نے اپنے گھر پر تقریباً 40 افراد کے مبینہ حملے کے خلاف سینیٹ کی استحقاق کمیٹی میں تحریک استحقاق جمع کرادی ہے۔
کامران مرتضیٰ کی جانب سے جمع کرائی گئی تحریک کے مطابق 4 نومبر کو تقریباً 40 افراد نے ان کے ذاتی گھر نمبر 70-D، سمنگلی ہاؤسنگ اسکیم کو گھیرے میں لے کر دھاوا بولا۔
ان کا کہنا ہے کہ نامعلوم افراد نے گھر کے مرکزی گیٹ پر لاتیں ماریں اور دیواروں پر چڑھ کر گھر کے اندر کی تصاویر بنائیں۔ واقعے کے وقت ان کے چھوٹے بھائی عدنان کے علاوہ گھر میں خواتین اور بچے بھی موجود تھے۔
کامران مرتضیٰ کے مطابق شور شرابہ سن کر محلے کے لوگ جمع ہوگئے۔ اس دوران وہاں موجود چند طلباء نے اپنے ذاتی موبائل فون کے کیمروں سے ان افراد کی ویڈیوز بنانے کی کوشش کی، تاہم انہیں ویڈیو بنانے سے منع کردیا گیا۔
سینیٹر کامران مرتضیٰ نے اس واقعے کے خلاف سینیٹ کی استحقاق کمیٹی میں تحریک استحقاق جمع کرادی ہے۔ ان کی جانب سے بیان کردہ تفصیلات میں گھر کے گھیراؤ، مرکزی گیٹ پر لاتیں مارنے اور اہل خانہ کی موجودگی میں دیواروں پر چڑھ کر تصاویر بنانے کے واقعات شامل ہیں۔
