عمران خان کی رہائی نہیں دیکھ رہا تھا، سہیل آفریدی کا نام تین ماہ پہلے فائنل ہو چکا تھا: علی امین گنڈاپور

علی امین گنڈاپور نے عمران خان کی رہائی سے متعلق گفتگو کرتے ہوئے کہا کہ انہوں نے عمران خان کو بتایا تھا کہ وزیراعلیٰ کی کرسی پر بیٹھ کر انہیں ان کی رہائی نظر نہیں آ رہی۔ ان کے مطابق وہ اپنے دور میں سیاسی دباؤ کو مینیج کرتے تھے اور ان کے ہوتے ہوئے عمران خان کے ذاتی ڈاکٹرز بھی ان سے ملاقات کر رہے تھے۔

علی امین گنڈاپور کا کہنا تھا کہ عمران خان سے ملاقاتیں بھی ہو رہی تھیں اور انہیں سہولیات بھی حاصل تھیں۔ انہوں نے دعویٰ کیا کہ ان کی حکومت کے دوران عمران خان کے ساتھ رابطوں اور ملاقاتوں کا سلسلہ جاری رہا۔

سابق وزیراعلیٰ خیبر پختونخوا نے مزید کہا کہ انہیں ہٹائے جانے سے تقریباً تین ماہ قبل ہی سہیل آفریدی کا نام فائنل کر لیا گیا تھا۔ علی امین گنڈاپور کے مطابق انہوں نے سہیل آفریدی کا نمبر بلاک کیا ہوا ہے۔

علی امین گنڈاپور کے بیان کے بعد خیبر پختونخوا کی سیاسی صورتحال، عمران خان کی رہائی اور پارٹی کے اندر ہونے والے فیصلوں کے حوالے سے بحث ایک بار پھر شدت اختیار کر گئی ہے۔ تاہم بیان میں کیے گئے دعوؤں پر متعلقہ فریقین کا مؤقف سامنے آنا باقی ہے۔